搵銀經濟學　學經濟搵銀

喺投資嘅世界真係邊個都唔好信…

2009-02-19T22:00:00.004+08:00

2月19日蘋果日報報導，備受推崇嘅畢菲特，早前認為美股見底嘅畢菲特，竟然密密減持美股，而且仲係P&G、Johnson & Johnson等「生活必需股」…證明咗兩樣嘢：

1. 唔好害怕挑戰權威，有理就說清…
2. 喺投資嘅世界真係邊個都唔好信…

http://appledaily.atnext.com/template/apple/art_main.cfm?iss_id=20090219&sec_id=15307&subsec_id=15320&art_id=12223974

期指牛證小勝一仗後市點睇?

2009-02-15T22:09:00.000+08:00

「呢度二千五，你數數…」甫坐下來，敗家陳百般無奈地把5張大牛塞進我的口袋裡。

「攪乜？仲乜無端端俾錢我駛？乜我有借過錢俾你咩？？」我有點兒一頭霧水。

「你唔記得啦，上次你咪話玩『恆生口數』，我估恆指升，你估跌，三個月後『結算』，恆指2月11日收13539點，比三個月前跌咗501點，你羸咗…二千五，願賭服輸。」

「我吹水講下架咋，唔駛真係現兜兜喎…」我想起來了，去年尾敗家陳不斷問我股票事而，煩擾不堪，為了擺脫他的纏繞，我才跟他賭甚麼鬼屁口數。

「泰利兄，呢三個月嚟我牛咁眼昅實恆指，真係好似過山車咁，同你賭恆指升跌嗰日收14040，跟住跌到落10676嗰陣真係有啲淆架，如果真係喺咁上下水位徘徊嘅話，五蚊一點計，輸成，兩萬幾架嗎；但反彈至15652嗰陣，又一心以為可以去到萬六，羸你二千點（一萬蚊）兼剝你把牙。可惜高位無以為繼，跌番落嚟，好彩最終都只係輸幾百點，當食少餐晏仔。」雖則輸錢，但敗家陳還是說得興奮。

「不過咁喎，你話恆指會跌，雖然今次係你嬴咗，但恆指最終都有大反彈，而你又估唔到…不過過咗去既就唔好提啦，阿泰利哥，後市點睇呢？」哥前哥後真係最少三分險，滿以為嬴咗佢可以賺番佢少少尊重，原來又係想知股市去向。

「你講得冇錯，我真係估唔到低位反彈超過20%。在我嚟講，短期股市去向我唔識估，只知大方向，我得承認呢個事實。我無短期預測能力，正如測不準定理指出，電子既運動係不可預知嘅一樣，但如果一個人你手中揸住個波，你觀察下佢隻手嘅方向，就大致可以知道個波將會向左定向右，但你就唔會知道波裡面嘅電子會喺波裡面既邊個部分，呢個就係股市long-run同short-run嘅分別。長期走勢就好似個人手中嘅波一樣，會係『睇得到』；但波裡面嘅電子，就『睇唔到』，兼『測不準』。」敗家陳聽得似懂非懂。

「關於嚟緊股市去向，喺依家13555水平而言，我真係唔知何去何從。美股方面我不敢樂觀，而我一早就話畢菲特佢老人家要坐坐艇，依家你見佢只買高息企業債券而冇入股，你就可睇到啲端倪。」

「講到奧巴馬既救市方案會否有助美股，一來要擔心好消息出貨，二來你要認真睇下美國人民嘅生活狀況，睇下以零售業為主嘅美國經濟，喺失業人數不斷上升嘅情況下，究竟2008甚至2009嘅公司業績會否有起色？就算政府肯幫啲次按業主供樓，如果啲人冇嘢做又點供，真係政府會幫佢地全數孭起間屋嗎？顯然不可能；而救市方案究竟可以創造到幾多職位，而家言之尚早；加州會否真係玩破產？呢啲都係你要好留心嘅問題。」

「另外要注意中國股市動向，上證指數由1800去到依家2300而整體成交又有支持，重返3000億水平，咁就配合咗之前周小川所講：一月新增人民幣貸款額達創紀錄的約1萬6000億元。即係話，前兩個月中國股市嘅興盛同呢筆錢不無關係，好可能只係乾炒一轉。（政策）貸款不但冇去到企業家手中用以製造就業，反而去咗投機炒股。呢個同中央政府一心放水救經濟，促內銷，保就業嘅方向完全背道而馳。喺咁嘅情況下，我唔知中央政府幾時會叫停，不過就有中央官員已經出聲，話息口下調空間不大，加上阿爺向銀行表示要查數，明確要求銀行匯報放水詳情，而當中有冇資金放咗落嚟炒港股，駛唔駛『班資回朝』？除非你識得知道『國家機密』嘅內地同胞,否則暫時真係天曉得。」

「咁即係港股會升定跌啫？」敗家陳又擺出一臉不耐煩的樣子。

「我嘅答案係：唔知。上述我講嘅原因就話咗俾你知我點解唔知。投資股票，除了看好看淡都要有原因外，唔知都要有充分原因，決唔可以順口開河。現時美中港股市情況十分不明朗，正所謂師父教落，睇唔清就唔好落場，做塘邊鶴過過癮亦無不可。與其玩上落市，不如勤力啲睇多啲資料仲好。」

「咁依家有乜好投資？」見敗家陳所問，真係猶如劉大俠所言，唔單止女人，只要係人，有錢，都會…咬身痕。」

「其實呢排都唔係好留意股市，我而家最主要係留意美元動向，因為如果美元有乜三長兩短，股票會冇咩好下場呀？依家股市有咁多不明朗因素，不如玩啲正處於牛市，肯定有得升既嘢──黃金。我可以話俾你聽，$1033美元一安士嘅黃金唔係高位。有關黃金嘅理論，我同Uwants討論區一班網友已經講過一啲理論，有興趣你可以去去睇睇。」

「嘩！又中國美國，股票又咁多種，依家又話要留意外匯商品黃金，邊睇得咁多？」（小朋友又埋怨）

「學海無涯呀！唔辛苦邊得世間財呀？你有老豆養，唔知道生活苦況架啦，俾啲心機慢慢學啦。」

做人要做盧Ｘ仁

2009-01-04T20:29:00.000+08:00

多謝今期（2009年1月3日版）i-Money，令我對自己素來尊敬的盧Ｘ仁博士認識更深入。

盧博士給我的印象──靈活走位醒目仔一名，港人中之港人典範。由前鋒中鋒到後衛到守門員到參與不同球隊，由香港電訊（電盈前身）到I.T.（999），無一不通無一不曉，亦無一不能勝任。

文中提及打工仔的保飯碗秘笈，如「待人接物的態度成了能否融入公司的關鍵，保持開放、態度謙虛、勇於學習；未來兩年是survival of the fittest等」（原文照錄），更是猶如旭日東昇之真知灼見，佩服佩服。

如打工仔能學會盧博士一招半式，相信必能在勞工市場立於不敗之地，不論經濟起伏，裁員減薪包保與之一世無緣。

多謝畢菲德，令我知道了解公司管理層對投資股票是多麼重要。「強」將手下無「弱」兵，一點不假。

更感謝今期i-Money攝影師提供清晰大頭特寫照──相學老師教授的觀人辨色技巧貨真價實，童叟無欺。

市場險惡，投資搵食，記緊睇路。

如果我係阿爺系列之好好攪基建

2008-11-20T02:38:00.001+08:00

美國的金融海嘯，威力…真不得了耶！第一下來到我們家便直捲珠三角呀。咱們在北京又看到工人們集結起來，追討欠薪啦，此事弄不好恐怕又來個六甚麼事件，真的要警惕警惕…

好容易推出個四萬憶元救市方案，好得很！！現在的境況，我們橫豎都要攪個西部大開發，大攪基建，就趁這個機會好好買便宜貨，鐵礦石水泥等東西要盡量買入。說起鐵礦石，去年那個甚麼必甚麼拓的壞傢伙，真是獅子開大口，說要多charge我們運輸費，又要來個甚麼結盟二合一好壟斷供應，這實在太不像話啦，我們中國人就那麼他媽的好欺侮嗎？义他娘的運輸費，你有種就把鐵礦石從澳大利亞搬到巴西，繞一個大圈再運過來，到時我們就算你們的東西是巴西生產的好了！！！現在你們在刮金融風暴，發貨量要跌5%，咱們再好好「等一下」，讓你們的鐵礦石再降價，看你們能拿我們有甚麼辦法。說到底還是小強這招以逸待勞用的好。

按小強的說法，商品在那個天價的水平終究也會下來，澳元也會跌個四腳朝天，這兩樣又真的實現了，看來我們提攜他倒沒錯了。

現在澳元就在大概0.65美元喘定，那我們就在這個水平大買澳元吧。記緊叮囑小強要不動聲色，好好的幹。

有了一定數量的澳元，我們就把它推上，然後來招釜底抽薪，推動澳大利亞的鐵礦石以澳元報價，以升了值的澳元光顧打了折的鐵礦石，省掉的錢更可以用來提升新基建項目工人的工資，推動消費，可謂一雞三味，一石三鳥，而我們乘機擺脫可厭美元的陽謀又可有寸進了。哈哈哈…

呀！對了，那個鞍鋼(347)現在是在哪個水平呀？甚麼？還要五塊多港幣？太貴了吧！快給那個在香港的同志打個電話，通知他先用秘密戶口的錢換澳元。Ｈ股…還要等他再跌吧…

如果我係阿爺系列之一

「期指牛證」　口講錢賠

2008-11-11T23:58:00.001+08:00

朋友敗家陳最近見股市「有番起（氣？）色」，經常問我係咪時候撈底博反彈。筆者雖經常強調玩股要睇基本因素，不應心存僥倖博反彈，但朋友還是終日纏擾，話乜乜正牌股神都鼓勵入市，而家「終」個頭埋去應該冇衰云云。筆者不勝其煩，遂心生一計，給他來個口講，但用真金白銀賠嘅遊戲。

「嗱！敗家陳，睇你老豆大把，有錢咬身痕，唔賭唔安樂，我講乜長篇大論腳踏實地你都係啋我有味，不如咁啦，我而家同你玩一個遊戲，睇下我十年功力了得定係你會一世夠運，今日（11月11日）恆指收市14040點，我而家口頭賣個3個月「期指牛證」俾你，上限二萬點，下限八千點，每點幾錢你話（所有條款均可隨意制定，雙方同意即可，筆者今次建議係十蚊一點，對方都同意），三個月內一到20000點即算我輸，即時計數；相反，三個月內到8000點即算我嬴，都係即時計數。如果三個月後不到「收回價」，即以三個月後當日收市價計算，高過14040 即我輸（敗家陳估升），低過14040點即算我嬴（筆者估跌）。舉例說如果「埋數」果日跌至12040點，即我嬴兩皮（$10 X 2000點）；相反，如果升到16040點，即係我輸兩皮，君子一言，願賭服輸，話咁就咁，如何？」

「仲有，為公平起見，期間不得問我投資心得，點樣？」敗家陳點頭。（其實呢個同公平冇乜關係，只係我唔想佢煩我。）

靜靜雞話俾眾blog友知，我建議每點十元，敗家陳「淆淆地」，還價每點五元…

我同意，就每點五元。

結果如何，三個月後分解。

註1：如想此遊戲更加刺激，可建議不設「收回價」，但筆者唔建議咁做，因為都係朋友間玩下開心下，唔係玩博命。

註2：此遊戲本質唔多合法，建議只同熟朋友玩，仲一定唔可以白紙黑字，唔係條友輸咗唔忿走去證監報寸（我等散戶尚未上岸，官府一定做嘢），招惹官非就十分冇癮。

畢菲德獨食的聯想

2008-10-19T00:46:00.004+08:00

畢菲德在10月16日的紐約時報撰文，指出現在正是買入美股時機。

老人家此行為確實古怪。

佢強調呢個係私人投資（personal account），非以巴郡名義。佢做咗巴郡掌門咁多年，有好嘢竟然獨食唔益股東？咁唔似佢作風囉…怪哉怪哉也！

佢唔只話上岸，用湼盤形容佢老人家都絕不為過，係神枱級老祖宗，當知自己一行一言皆影響著全球投資人，從不順口開河，更無需做大戶打手唱好出貨，如今竟公然為文呼籲大中散戶入市，怪哉怪哉！

佢叫人入市嘅理據都係炒冷飯，都係「人怕你就貪，人貪你就縮」；「長期必賺，短期莫問」呢啲老生常談。

問題係，巴郡可以長玩長有，代代相傳（理論上），但佢老人家今年七十有八，仲玩長線投資？

其實，文中並無提及私人資金入市比例，如果只玩一成身家，都係遊戲一場，得啖笑而已；而筆者相信，以佢嘅作風，如果佢認為一兩年後美股會復蘇，多數會用巴郡名義大舉入市，而唔會「私私縮縮」玩獨食。

美股長期而言會復蘇就牛頭角順嫂都知，用不著畢老長篇大論提點。問題到底係幾時，係你返天堂老家先定係股價返家鄉先…

筆者認為，畢老推測美股不會於一至兩年內復蘇，在此情況下如果佢以巴郡名義做嘢，嚟緊兩年巴郡盤數會難睇過曾特首俾人擲蕉嗰塊面。

另外，有網友報料話，根據明報2006年4月4日嘅報導，佢老人家嗰年印咗價值140億美元嘅指數認沽期權（即係佢買市升），如果美國個市係咁跌，就算輸呢個數對佢老人家無關痛癢，但有失名聲嗰下嘢面懵呀嗎…

筆者預測，美股尚未見底，一來對沖基金及CDS嘅情況仲係令人擔憂，你點知會否再有新一輪嘅套現潮、填數潮？二來就算見底，股價有耐唔升都輸機會成本啦！（你估公司盈利會否於2010前改善？）

明此理，作為散戶，請唔好話老畢入市而欠缺其他理據就「終」個頭埋去，否則就…（就算長期會升番）嚇得一陣陣矣！

註：畢菲德文章刊於10月16日，當日杜瓊斯收報8979點，筆者現大膽以20%為界，如果杜指未來會比16日收市多下跌20%至7183點，杜指尚未見底的預測便算準確。

筆者認為，作為專業投資者，如果不能預測20%以上嘅價格波幅就係失敗（股仔除外）。

順帶一提，杜指52週低位為7774點。

畢菲德紐約時報原文：
http://www.nytimes.com/2008/10/17/opinion/17buffett.html?scp=1&sq=Buy%20American.%20I%20Am.&st=cse

再談雷曼事件

2008-10-17T13:01:00.001+08:00

雷曼事件，如果銀行要上身，咁就大鑊。

要知道，銀行的角色只係中間人，屬過水濕腳角色，始作俑者乃雷曼也，如果銀行要賠款（尤其要賠足嘅話），咁就真係偷雞唔到蝕渣米矣！

漲定縮？滯漲定通縮？

2008-10-17T08:19:00.002+08:00

欲猜黃金的去向，一定要看美元。而美元的去向將造成通漲或通縮。

通所週知，通過千億又千億美元的救市方案，美元本質上已成村長個女，只因祖先淨落家底雄厚，兼且過去幾十年此女確又有幾分姿色，故暫時仲可以叫頂得住下，但以後又點呢？

未來經濟的去向，一是滯漲，二是通縮。至於通漲，由於經濟向下需求減少，失業率唔向上都唔會跌啦，你敢話未來可見日子會有通漲？

如果估計新增美元會大量流出市面，資金沒太多出路，唯有盲炒商品原材料（你敢炒股？2010年前公司盈營利前景你敢睇好？）造成滯漲－揸黃金隨時發過豬頭。

如果估計新增的美元大部分只用來填數，沒有許多流出市面，加上經濟回落需求減少──通縮則已，揸住黃金可能渣都冇。

至於滯漲定通縮呢個問題，自問到目前為止，怒我呢個喺今次金融漣漪中keep得住四肢健全嘅…暫仍答不出來。

雷曼迷債事件　銀行誤導客戶鐵證如山

2008-10-16T20:17:00.003+08:00

大家還記得開股票戶口嘅時候，經紀會叫開戶者簽一份創業版「生死狀」嗎？該份文件清楚指出投資創業版的風險，情況最壞者甚至會輸掉所有資金。假若有客戶因輸掉資金而又想賴帳，股票行便會拿這份文件「指證」該客戶「吹水」。

同理，如果銀行能向公眾展示此類「生死狀」文件，指出客戶已在有關文件簽署，知道迷債的最壞情況是一旦雷曼倒閉，投資者有可能輸掉所有本金的話。那就能推翻銀行誤導客戶的指控，可現在似乎還未見該類文件曝光，這就證明苦主們有很大機會不知道迷債的風險。

至於那些胡亂評估風險的問卷，看過的人都知道，根本不能與此類「生死狀」相比，況且，好些風險問卷還是後補的。

搵銀經濟學 學經濟搵銀

喺投資嘅世界 真係邊個都唔好信…

期指牛證 小勝一仗 後市點睇?